تشغيل أول أتوبيس برمائي في مصر بنهاية 2025

لأول مرة في مصر هيتم تشغيل أتوبيس برمائي بيمشي على الأرض وبعدين يدخل المياه يكمل رحلته في نهر النيل.

وزارة النقل وهيئة النقل النهري أعلنوا إن التشغيل التجريبي للأتوبيس هيبدأ قبل نهاية السنة، وبالتعاون مع وزارة السياحة علشان يستخدموه في الرحلات السياحية مش في المواصلات اليومية.

المرحلة الأولى من المشروع هتكون في مدن سياحية زي القاهرة، الأقصر، وأسوان، والهدف ربط المزارات البرية بالفسح النيلية في رحلة واحدة، من غير ما تضطر تغير وسيلة المواصلات.

الأتوبيس هيكون مجهز بممرات خاصة تسهّل نزوله وطلوعه من المياه، وهيخضع لاختبارات أمان قبل التشغيل، وكمان هيكون مزود بوسائل سلامة للركاب والسائحين.

 التجربة دي خطوة أولى في خطط أكبر لتطوير النقل النهري لحد 2030، واللي بيستهدف يوصل عدد وحدات النقل لـ 520 وحدة تخدم ملايين الركاب وتنقل بضائع أكتر بأمان وكفاءة.