عروض أفلام "فيلم كلينك" في سينما زاوية من ٢٤ سبتمبر لـ ٧ أكتوبر

سينما زاوية هتعرض أفلام "ورقة شفرة"، و"ميكرفون"، و"لا مؤاخذة"، و"يوم الدين"، و"الأقصر"، و"علي معزة وإبراهيم"، كل ده في الفترة من 24 سبتمبر لـ 7 أكتوبر، وده جزء من برنامج "عشرين سنة فيلم كلينك"، اللي بيحتفل بإنتاجات شركات "فيلم كلينك" السينمائية.

البرنامج جدول كالتالي:
 

يوم الأربعاء 24 سبتمبر، والجمعة 3 أكتوبر، والثلاثاء 7 أكتوبر، هيتعرض فيلم "ورقة شفرة" بطولة هشام ماجد وشيكو وأحمد فهمي، وبيحكي عن 3 أصحاب بيتغير مصيرهم بعد وفاة جد واحد منهم واكتشافهم لسر عنه، وبسبب السر ده بيتعرضوا لاختبار صعب ما بين الحفاظ على حياتهم أو التنازل عن الكنز اللي الجد سابه.

يوم الخميس 25 سبتمبر، والأربعاء 1 أكتوبر، والإثنين 6 أكتوبر، هيتعرض فيلم "ميكروفون" بطولة خالد أبو النجا، وبيحكي عن "خالد" اللي قضى عمر كبير في أمريكا ولما رجع الإسكندرية مرة تانية، عشان يصلح علاقته بحبيبته ووالده كان الوقت اتأخر، وفي أثناء ده "خالد" بيقابل شباب من الإسكندرية وبيتعرف على أحلامهم المختلفة.

ويوم السبت 27 سبتمبر، والسبت 4 أكتوبر، هيتعرض فيلم "يوم الدين"، تأليف وإخراج أبو بكر شوقي، وبيحكي عن "بشاي" اللي عاش في مُستعمرة للمصابين بالجُذام. وبعد وفاة زوجته المصابة بالجذام، بيسيب المستعمرة، وبيحاول مع صديقه "أوباما" وحماره أنه يرجع تاني لقريته بقنا عشان يقابل عائلته.

ويوم الأحد 28 سبتمبر هيتعرض فيلم "الأقصر"، تأليف وإخراج زينة الدرة، وبيحكي عن عاملة الإغاثة البريطانية "هانا" اللي بترجع لمدينة الأقصر القديمة، عشان تقابل "سلطان" عالم الآثار الموهوب، وهناك ذكريات الماضي بتحاربها.

ويوم الإثنين 29 سبتمبر، والأحد 5 سبتمبر هيتعرض فيلم "لا مؤاخذة"، تأليف وإخراج عمرو سلامة، وبيحكي عن "هاني" ولد مسيحي تضطره الظروف إنه يسيب مدرسته الخاصة، ويتنقل لمدرسة حكومي، وهناك بيقولهم إنه مسلم وده بيخليه يعدي بمشاكل وتعقيدات كتير بسبب ديانته.

ويوم الثلاثاء 30 سبتمبر، هيتعرض فيلم "علي معزة وإبراهيم"، واللي بيحكي عن "علي" شاب بيحب معزته، وده بيعرضه لتريقة وانتقادات كتيرة، وبسبب ده مامته بتجبره يقابل معالج روحاني وهناك بيقابل "إبراهيم" اللي بيعاني من اكتئاب حاد بسبب سماعه لأصوات حادة، ومن هنا بتبدأ رحلتهم.

وغير الأفلام اللي هتتعرض، فيوم 24 سبتمبر هيكون في جلسة نقاش مع المنتج والسيناريست محمد حفظي، مؤسس ورئيس فيلم كلينك، عشان يشارك الجمهور تفاصيل عن بدايات وكواليس فيلم ورقة شفرة وده بعد عرض الفيلم، وهيدير الحوار المخرج أحمد عبدالله.

ويوم الخميس 25 سبتمبر هيكون في جلسة نقاش مع المخرج أحمد عبدالله، مخرج فيلم "ميكروفون" عشان يحكيلنا عن الفيلم كمحطة مهمة في تاريخ الأفلام المستقلة المصرية، وهيدير النقاش المنتج محمد تيمور.

حجز الأفلام والنقاشات متاح دلوقتي في سينما زاوية.