فيلم «المقابلة» لسارة عبد الرحمن متاح الآن على YouTube

الفيلم القصير "المقابلة" لسارة عبد الرحمن بقى متاح دلوقتي للمشاهدة على Youtube بعد عرضه ضمن فعاليات مهرجان القاهرة السينمائي سنة 2023، في تجربة سينمائية من كتابة وإخراج هند متولي، وإنتاج نورا الخطيب وهند متولي، وبطولة سارة عبد الرحمن.

سارة عبدالرحمن بتلعب شخصية "نادية"، اللي بيجيلها فرصة شغل ممكن تغير حياتها، لكن بتلاقي نفسها لازم تختار بين مستقبلها وبين إنها تفضل في البيت تراعي مامتها.

بيشارك في التمثيل، هدى شحاتة في دور "هالة" ونجلاء يونس في دور "منال"، وجهاد حسام الدين صوت "سلمى".

والمخرجة هند متولي قالت: «وقت كتابة الفيلم، كان مهم بالنسبة لي أقدم علاقة معقدة بين البنت وأمها، من غير ما يكون سهل إننا نحكم مين صح ومين غلط. الظروف أحيانًا بتحطنا قدام اختيارات صعبة، وكنت مهتمة إن الفيلم يخلينا نفكر في الأسباب اللي ورا اختيارات الشخصيات قبل ما نحكم عليها».

وعن تجربتها في الفيلم، قالت سارة عبدالرحمن: "فيلم المقابلة بالنسبة لي تجربة مليانة استكشافات سواء في شغلي عليه في التمثيل أو كرحلة للفيلم مع طاقم العمل."