جامعة الإسكندرية هتنزل المحاضرات أونلاين عشان تخفف زحمة الطلاب

أعلنت كلية تجارة في جامعة الإسكندرية عن مبادرة هدفها إن كل المحاضرات يتم رفعها على الموقع الرسمي للكلية، وإن الطلبة يقدروا يشوفوها ومايروحوش لحد هناك.

عميد الكلية الدكتور السيد الصيفي قال في تصريحات لـ"المصري اليوم" إن الفكرة كانت من طالب في الفرقة التانية اسمه مدحت ماجد عزمي، وإن هدفها تجنب الزحام ومعاناة المواصلات أو سوء الطقس، وهيتم تنفيذها من الترم الجاي وهيبقى متاح التواصل مع الدكاترة من خلال الموقع الرسمي للكلية.

عميد الكلية شايف إن الفكرة دي هتغني عن الدروس الخصوصية اللي "بتخرب" البيوت، وقال إن الكلية بتضم 45 ألف طالب وإن ده بيتسبب في زحام شديد لكن مع الفكرة دي الموضوع هيقل، كلية تجارة قدمت قبل كده مبادرة الكتاب الإلكتروني والتصحيح الإلكتروني وبعد عرضهم على وزير التعليم العالي تم تعميهم على جامعة الإسكندرية كلها.