متحف نجيب محفوظ فتح فترة مسائية للزيارة يوم السبت والحد من كل أسبوع

وبكده المتحف هيفتح فترة صباحية ومسائية أيام السبت والأحد، فترة صباحية من 9 الصبح لـ 2 الضهر، وفترة مسائية من 6 بليل لـ 10 بليل.

أما باقي أيام الأسبوع فالمتحف هيفتح فترة صباحية بس، من الساعة 9 الصبح لـ 4 الضهر، ما عدا يوم الثلاثاء لكونه إجازة المتحف.

القرار ده هدفه زيادة عدد الزوار وإتاحة فرصة للجمهور عشان يشوفوا اللي بيضمه المتحف من مقتنيات نادرة، بتروي سيرة ومسيرة الأديب العالمى نجيب محفوظ، ومن ناحية تانية لعمل أنشطة ثقافية وفنية وموائد مستديرة.

المتحف بيتكون من قاعة "تجليات" اللي فيها مشاهد مسجلة لنجيب محفوظ بيتكلم فيها عن حياته ومسيرته وفلسفته، وقاعة "الحارة" اللي بتعكس البيئة الشعبية اللي أثرت في أعمال نجيب محفوظ، وقاعة نقاش ومجموعة من المكتبات بتضم واحدة منها أبحاث ودراسات عن أعمال محفوظ.

وبيحتوي المتحف على مجموعة من القاعات التانية لعرض جائزة نوبل، ومتعلقات محفوظ الشخصية، زي: بدلته وقبعته وحذائه، وكمان تم تخصيص قاعتين في المتحف لعرض أوسمة وشهادات محفوظ المحلية والدولية.

المتحف موجود في القاهرة بحي الجمالية بالقرب من جامع الأزهر في مبنى تراثي من دورين، يعود تاريخه لسنة 1774، وهو عبارة عن تكية اتبنت في عصر الدولة العثمانية وكان اسمها تكية أبو الدهب، وتم تخصيصها كمتحف لنجيب محفوظ وافتتاحه سنة 2019.