قصر "بنت الخديوي توفيق" في حلوان هيتحول لمتحف أديان

الأميرة خديجة، بنت الخديوي توفيق اللي حكم مصر في الفترة من 1879 ل 1892، كان عندها قصر لطيف في حلوان، لسه موجود في مكانه، محافظة القاهرة ومكتبة الإسكندرية، قرروا يستغلوا القصر ده ويحولوه لمتحف أديان. المحافظة والمكتبة وقعوا بروتوكول استغلال القصر، علشان ،حسب كلام المحافظ، يحولوه لمركز ثقافي وحضاري.

 

مدير مكتبة الإسكندرية، مصطفى الفقي، قال إن المتحف ده هيكون فيه حاجات من كل الديانات اللي مرت على مصر، من أول الديانات المصرية القديمة للأديان السماوية التلاتة، علشان يكون المكان ده بيبين احتضان مصر لكل الديانات. الفقي أضاف كمان، إن المشروع هيدي للعالم رسالة عن مصر وعن التسامح اللي فيها.