عرض ٧ أفلام عن غزة ضمن برنامج "نافذة على فلسطين" في النسخة الثامنة

مهرجان الجونة السينمائي أعلن عن رجوع برنامج "نافذة على فلسطين" للعام التالت على التوالي، ضمن فعاليات الدورة الـ8 اللي هتتعمل من 16 لـ24 أكتوبر 2025.

السنة دي البرنامج جاي بـ 7 أفلام قصيرة جديدة من مبادرة "من المسافة صفر وأقرب".. كلها بتحكي عن غزة: الحياة، الحرب، الأحلام الصغيرة اللي بتتحول لفعل مقاومة.

 من الأفلام المشاركة : 

ألوان تحت السماء للمخرجة ريما محمود،  فنانة بتحاول تسجل أغنيتها وسط الخراب.

 أحلام فرح وزهرة للمخرج مصطفى النبيه،  طفلتين ماسكين في أحلامهم ضد كل اللي بيحصل.

 غزة إلى الأوسكار للمخرج علاء دمو، مخرجين بيحوّلوا الألم لسينما بتسافر للعالم.

 حسن للمخرج محمد الشريف،  مراهق بيدور على كيس دقيق ويلقى نفسه في رحلة اعتقال.

أحلام صغيرة جدًا للمخرج اعتماد وشاح،  نساء المخيمات وصراع يومي عشان الكرامة.

 الأمنية للمخرج أوس البنا،  مخرج مسرحي يحوّل الجراح لعرض فني.

حكايات غير مكتملة للمخرج نضال دمو،  قصص توقفت عندها الحرب وبقت هي الحكاية.

 ماريان خوري، المديرة الفنية للمهرجان قالت: "البرنامج مش مجرد اختيار فني.. هو رسالة. السينما قادرة توثق وتداوي، ومن واجبنا ندي مساحة للعالم يشوف صمود الفلسطينيين."

أما رشيد مشهراوي، صاحب المبادرة، فقال:"العالم خذلنا.. بس السينما كانت منقذنا الوحيد. الشباب في غزة قدروا يخلّوا إنسانيتهم وأحلامهم توصل للعالم."