لأول مرة أروقة خاصة بذوي الهمم بالجامع الأزهر وفروعه في المحافظات

"الأروقة الأزهرية" عبارة عن نظام دراسي داخل الجامع الأزهر معمول علشان الناس تتعلم العلوم الشرعية واللغة العربية والقرآن والتجويد والخط العربي وغيره، وبيشارك فيها كل الفئات العمرية، دلوقتي كمان بقى فيها رواق خاص لذوي الهمم علشان يلاقوا فرصة يتعلموا ويتفاعلوا في بيئة مناسبة ليهم.

والقرار ده جِه بعد الإقبال الكبير على البرامج اللي الأزهر قدمها لذوي الهمم الفترة اللي فاتت، من تحفيظ القرآن الكريم، وتعليم التجويد والتلاوة، ودروس بلغة الإشارة، وتعليم اللغة العربية والخط العربي، واللي حققت نجاح كبير جدًا وشجّعت الأزهر إنه يوسّع التجربة دي في كل المحافظات.

الدكتور عبد المنعم فؤاد، المشرف العام على الأروقة الأزهرية، قال إن الخطوة دي جزء من رؤية الأزهر لدمج ذوي الهمم في المجتمع وتعزيز قدراتهم التعليمية والدينية، وإن الهدف إنهم يلاقوا بيئة تعليمية شاملة تساعدهم على التواصل والتفاعل بشكل أفضل.

أما د. هاني عودة، مدير عام الجامع الأزهر، فقال إن الأروقة الجديدة هتقدّم برامج متخصصة لذوي الهمم، بتساعد على تنمية مهاراتهم الحياتية والدينية، وبتعكس روح التعاون والتلاحم بين فئات المجتمع، وقال كمان إن دي خطوة مهمة لرفع الوعي وتشجيع مشاركة ذوي الهمم في الحياة العامة.

 يُذكر إن أروقة ذوي الهمم بتُضاف لأنشطة كتير بيقدمها الرواق الأزهري زي تحفيظ القرآن، وتعليم العلوم الشرعية، واللغة العربية، والخط والزخرفة الإسلامية، والملتقيات الدعوية للمرأة والطفل والأسرة، وده كله بهدف نشر العلم الوسطي والوعي الديني الصحيح من منبعه الأصيل.

وعشان تقدر تشترك في رواق ذوي الهمم بالمحافظات، سجل في الإستمارة الموجودة ببوابة الأزهر الشريف من هنا.