"بس ماتقولش يأس" حكاية كتاب بيكلمنا عن مرحلة إنقطاع الطمث (Menopause)
لأن رحلة الوعي بتبدأ بكلمة
"حسيت إن جسمي مش بتاعي زي الأول" ده غالبًا الرد اللي هتسمعه لو سألت أي ست عن مرحلة إنقطاع الطمث (Menopause)، إجابة بتلخص سنين من الإحساس بالقلق والخوف والتوتر وهبات السخونة والأرق، وأكتر من 35 عرض تاني بتحس بيها الست في الفترة دي.
انا عندى 46 سنة، وانقطاع الطمث فترة هبتدي أخش فيها أنا وستات كتير حواليا، وكلنا محتاسين ومش عارفين إيه سن اليأس؟ وايه اللي بيحصل؟ فابتدينا نقول لأ إحنا لازم نكتب كتاب عن مرحلة إنقطاع الطمث (Menopause)، وإيه الحاجات اللي بتحصل في الفترة دي؟ (مي عبد العظيم، صاحبة فكرة كتاب "بس ماتقولش يأس" والمشرف العام عليه) وعشان اللي بيحصل جوه الجسم، مش المفروض خالص يفضل جوه الجسم، جلنار عصمت ألفت كتاب "بس ماتقولش يأس"، عشان يكون من أهم الكتب اللي بتفهم وبتحس وبتعبر عن مرحلة فضلت سنين مسكوت عنها. "لو حد هيعمل كتاب عن مرحلة إنقطاع الطمث (Menopause) ممكن يتقلب لكتاب ناشف وطبي أوي ومحدش هيعوز يقراه، ففكرت وقولت ما ممكن نحوله لقصة عن مجموعة ستات كلهم في نفس المرحلة وهتبقى قصة كل ست بتمثل عرض من أعراض مرحلة إنقطاع الطمث (Menopause)، فالكتاب بيحكي عن 8 ستات بأهم 8 أعراض الست بتحس بيها." (جلنار عصمت، مؤلفة كتاب "بس ماتقولش يأس") من حق الكبير يفهم: جلنار ماكتبتش الكتاب من فراغ، ولا حبًا في التأليف. لكنها كتبته عشان تفهم وتّفهم غيرها بعد ما كانت هي نفسها واحدة من الستات اللي بيدروا في جوجل عشان يفهموا أسباب لأعراض غريبة ابتدوا يحسوا بيها، وفضلت شهور مش فاهمة إيه اللي بيحصل لجسمها. "أنا ابتدى يجيلي قلق وخوف، وعدم قدرة على النوم، ولفيت على كل الدكاترة مفيش حاجة بتتحسن، مش عارفة أنام وخايفة إن أنا مش فاهمة ده بيحصل ليه؟ فضلت في المرحلة دي لحد ما اتكعبلت بالصدفة في مقال لهارفارد بيقول إن من ضمن الأعراض الشائعة لمرحلة إنقطاع الطمث (Menopause) مشاكل في النوم والقلق، حسيت ساعتها كإن في لمبة نورت." (جلنار عصمت، مؤلفة كتاب "بس ماتقولش يأس") عمر ضايع يحسبوه إزاي عليا؟ لما جلنار فهمت وشافت إن في أكتر من 10 سنين بتضيع من حياة كل ست من غير أي توعية أو اهتمام، أطلقت ساعتها منصة "Your Golden Hour"، كمحاولة لتسهيل التجربة على ستات تانيين، وتقديم محتوى حقيقي عن مرحلة إنقطاع الطمث (Menopause) بلغة بسيطة، وقريبة. "ضروري نتكلم لأن مرحلة إنقطاع الطمث (Menopause) مش بتأثر على الست بس، أنتٍ ممكن بسبب إنقطاع الطمث (Menopause) تكوني متعصبة ويبقى عندك اكتئاب وقلق وده بيأثر على دايرتك المقربة اللي هما ولادك وجوزك، فكل ما تبقي واعية أكتر واللي حواليكي واعيين إن دي مرحلة ليها تحديات وفي أساليب للتعامل مع التحديات دي، مجرد المعرفة بتخليكي متقبلة الأعراض أكتر." (جلنار عصمت، مؤلفة كتاب "بس ماتقولش يأس") مش بس كده، جلنار بدأت تقدم ورش ودورات تدريبية بتساعد الستات يجهزوا نفسيًا وبدنيًا للمرحلة دي، بدل ما يكتشفوها فجأة. "عملت صفحة "Your Golden Hour" لأن محدش بيتكلم ولا بيهتم عن الفترة دي من حياة المرأة، فعملت الكونتينت من الألف إلى الياء." (جلنار عصمت، مؤلفة كتاب "بس ماتقولش يأس") في وادينا الطيب الست قيمتها مختذلة: انقطاع الطمث المفروض إنه مش نهاية العالم، بس مع ذلك عدد كبير من الرجالة بتوصف الست بمجرد وصولها للمرحلة دي بـ "منتهية الصلاحية"، ورغم إن ده اختزال كامل لقيمة الست في دور من وسط أدوار كتير بتقوم بيها، بس المشكلة اللي بجد بتظهر لما بتبدأ الستات بينها وبين بعض يفكروا إنهم خلاص كبروا، فاتت عليهم، عداهم الزمن، أو بمعني أوضح مبقاش عندهم حاجة تتقدم، فبدل ما الست تحاول تتبسط بوقتها بتتحول بكل سهولة لكائن ملهوش حياة، كإن قيمة الست مرهونة بأدوارها وبس. "قيمتك في نفسك في أنتٍ مين كبني أدم، معتقداتك إيه في الحياة؟ واللي بتقدميه لنفسك وللناس اللي حواليكي، دي قيمتك مهياش مربوطة بقدرة على الخلفة من عدمه عشان كده أكيد قيمتك مش في خصوبتك." (جلنار عصمت، مؤلفة كتاب "بس ماتقولش يأس") رسالة جلنار: يا مفرقين الحقوق أنا مخدتش: جلنار زي ستات كتير ما كانتش دارسة ولا عندها خلفية طبية، لكن كان عندها فضول وشجاعة وحب للحياة، خلاها ترفض تعيش في واقع مجهول مليان خوف ولحظات قلق. والتجربة علمتها إن أكتر حاجة بتتعب الست مش العرض نفسه لكن الخوف. لما الست بتدخل المرحلة دي من غير وعي بتلاقي نفسها في دايرة مفرغة من الأسئلة اللي ملهاش إجابة وده لوحده قادر يضاعف التعب. "الخوف أكتر حاجة متعبة، تخيلي أنتٍ بنت عمرك ما اتحكالك يعني إيه الدورة وإذ فجأة بتحصلك، الرعب هيخليكي حاسة بالألام عشر أضعاف، فأنتٍ لما متبقيش عارفة أعراض مرحلة إنقطاع الطمث (Menopause) دماغك بتودي وبتجيب في كل حاجة وده طبعًا بيزود الضغط، والضغط بيزود الأعراض فهي دايرة مفرغة، فلما يبقى على الأقل عندك معلومات جايز العرض مش هيتحسن بس بيخلي عندي تقبل وبيخليني عارفة اتعامل أحسن." (جلنار عصمت، مؤلفة كتاب "بس ماتقولش يأس")
الأكثر متابعة هذا الشهر
-
-
03 يونيو 2025 -
-
03 يونيو 2025
