الجمعة نوفمبر 20, 2026
Copied

عفاف راضي الصوت اللي غنى لطفولتنا ولسه عايش في ذاكرتنا

صاحبة أغنية «هم النم» و«سوسة سوسة» و«يلا بينا»

مريم بهجت

فيه أغاني بمجرد ما بنسمعها بنرجع بالذاكرة لسنين طويلة، بس هنرجع قد ايه؟ سنة اتنين عشرة؟ مفتكرش إن في أغاني كتير بتعيش أكتر من كده.

وانا بقلب في ريلز انستجرام طلع قدامي بالصدفة أغنية كلماتها بتقول "اصحي يا دنيا وقومي يا دنيا، واسمعي ديك الصبح صديقي، خذي من الكساروتة الامونيا، لبن الصبح وغيري ريقك" وببحث سريع عرفت إن دي أغنية لعفاف راضي، واللي بالصدفة برضو عرفت أنها صاحبة أغنية "سوسو سوسة" و"هم النم".

وعلى قد ما يمكن أنا ماليش ذكريات أوي مع الأغاني دي، بس كان في سحر طفولي كده يخليك تتبسط وتحس إنك عارف الاغاني دي أوي حتى لو اول مرة تسمعها، وبشوية تدوير عرفت إن مسيرة عفاف راضي مش بس طلعت بتهمني أنا، لكنها كمان كانت بتشغغل بليغ حمدي وجمال عبد الناصر وجمهور كبير جدا.

حكاية عفاف راضي بتبدأ من طفولتها هي كمان، لما اكتشف والدها بالصدفة موهبتها وهي صغيرة، وبدأ يشجعها ويدربها، وعشان الأب كان مؤمن ببنته أوي وخايف عليها أوي أوي، بقى يطلب منها تغني قدام أصحابه عشان يتأكد إن صوتها مش بس عاجبه هو، لكن كمان يقدر يوصل لناس تانية.

وفعلًا، لما اتأكد من موهبتها، قرر يوجهها للطريق الصح، ورغم إنها عايشة في المحلة الكبرى لكنه بيقرر يسفرها للقاهرة عند قرايبها عشان تتعلم في الكونسرفتوار، الموسيقى والعزف على البيانو والغناء الصح.

وعن الفترة دي، عفاف بتحكي في لقاءات تلفزيونية وتقول إنها كانت طفولة مرهقة جدًا بس ممتعة، وواحدة من التجارب اللي مش بتنساها، هي مشاركتها في برنامج "ماما سميحة" ضمن أطفال الكورال، فمثلًا عفاف شاركت في أوبريت "وطني حبيبي" واللي قالت أنه شاركها فيه هاني شاكر في دور عبد الحليم، وصفاء أبو السعود في دور شادية.

بليغ شعاره في الحياة قدم الجديد وخلي الجمهور يحكم عليه:

بتكمل عفاف مشوارها في الكونستفوار، وبتقرر تختار طريق الغناء الأوبرالي، إلا إن لقاءها بالموسيقار بليغ حمدي غيّر شكل مشوارها الفني خالص. فبليغ اقنعها تغني شرقي، واتبنى موهبتها وقدمها للجمهور، وكان شايف فيها صوت مختلف يستحق فرصة وسط جيل من كبار المطربين والمطربات بيضم أم كلثوم وعبد الحليم ووردة وشادية وفريد الأطرش وصباح.

لدرجة أنه كان بيقود الاوركسترا ليها بنفسه في الحفلات، ولحن لها أكتر من 60 أغنية عاطفية ووطنية، وكمان شاركها أول بطولة مسلسل إذاعي، عشان تكون دي أول وآخر مرة له في الإذاعة.

عمار عيل كبير أوي وسيد حجاب وأنا طرنا من الفرحة:

أما بقى تجربة عفاف راضي مع أغاني الأطفال مكانتش متخططة من البداية، لكنها بدأت بمكالمة من الشاعر سيد حجاب، اللي كان بيجهز مع عمار الشريعي ألبوم كامل للأطفال، وعرض عليها تغني أغانيه.

في البداية، عفاف استغربت الفكرة، خصوصًا إنها كانت بتحضر في الوقت ده أغاني عاطفية، ومكانتش متخيلة إنها هتسيبها وتغني لأطفال. لكن سيد حجاب طلب منها تسمع الأغاني الأول، وبمجرد ما سمعتها اتحمست للتجربة ووافقت، وقالت في حوار سابق إن الكلمات عجبتها جدًا لدرجة إنها قررت تأجل الأغاني العاطفية وتدخل عالم أغاني الأطفال.

والتجربة دي مكانتش مجرد شوية أغاني اتسجلت وخلاص، لأن الثلاثي عفاف راضي وسيد حجاب وعمار الشريعي كانوا مندمجين جدًا في الشغل، لدرجة إنهم لما ملقوش شركة إنتاج تتحمس للألبوم، قرروا يتحملوا تكاليف إنتاجه بنفسهم، وشاركوا في تمويله لحد ما خرج للنور وحقق نجاح كبير.

وقدمت عفاف من خلال التجربة دي مجموعة من الأغاني اللي فضلت موجودة في ذاكرة الأطفال، منها «هم النم» و«سوسة سوسة» و«يلا بينا» و«اصحي يا دنيا»، وكانت كلها من كلمات سيد حجاب وألحان وتوزيع عمار الشريعي.

عفاف راضي كل اللي سمع صوتها وقع في حبها، فما بين عبد الحليم اللي قال لما بسمعها بحس إن ليا أجنحة وعايز أطير، لحد الرئيس الراحل جمال عبد الناصر اللي وصى إن الإذاعة تهتم بيها وبموهبتها. بتفضل موهوبة وأغاني عفاف عايشة وسطنا، بنحبها وبنسمعها وبننقلها من جيل لجيل.

×