قصة مسجد الرحمن بالمظلات المبني بتبرعات الأهالي

كمبنى معتمد بشكل كامل على تبرعات الأهالي وبس صعب يكون في جدول ثابت للبناء، وده كان واضح فعلًا في رتم البناء، أهالي المنطقة قالوا إن البناء كان ممكن يستمر بشكل منتظم شهور، وشهور تانية مفيش طوبة واحدة تتحط. ولكن رغم كل المشاكل دي البناء تم وأهالي المنطقة حاربوا على حلمهم لآخر وقت.

بعد 47 سنة، وتحديدًا في 2026 بيتم افتتاح مسجد الرحمن خلال شهر رمضان، وصلاة التراويح يحضرها آلاف المصليين، وصور المسجد بعد صلاة الجمعة تكون على كل صفحات السوشيال ميديا.

افتتاح المسجد كان يوم عيد في شبرا، وكل واحد من أهالي المنطقة عبر عن سعادته بالافتتاح ده بطريقته، ناس قالت إن ده الحلم اللي أهاليهم حكولهم عنه سنين، وناس تانية قالت إن كل طوبة اتحطت في المسجد كان ليهم معاها ذكرى وده لأن بناء المسجد كان جزء أصيل من ذكرياتهم. 

مسجد الرحمن اتبنى على طراز الفن العثماني، ومستوحى من تصميم مسجد السلطان أحمد في تركيا، وعلى مساحة 4000 متر مربع، بنلاقيه بيضم 4 مآذن بارتفاع 110 أمتار، وبيستوعب حوالي 15 ألف مصلّي. عشان يكون واحد من أكبر مساجد القاهرة الحديثة.

مسجد الرحمن مش بس ساحة صلاة، لأن المجمع بيضم كمان معهد ديني، ومستشفى، ومكتبة، وقاعة مناسبات، عشان يفضل جزء من حياة الناس اليومية. وحاليًا تم ضم المسجد لمنظومة الرواق الأزهري التابعة لـ الأزهر الشريف، ليحمل اسم "مجمع الرواق الأزهري بالمظلات"، ومشيخة الأزهر هتتولى إدارته بالكامل.

مسجد الرحمن مش مجرد قصة افتتاح مسجد، ده حلم جديد اتضاف لمدينة الألف مئذنة، حلم بيفكرنا إن بيوت الله تُبنى بالإخلاص قبل الحجارة.