مصر تستضيف جولة لونجين العالمية لأبطال قفز الحواجز لأول مرة بالجيزة

من يوم 22 لـ24 أكتوبر الجاري، مصر على موعد مع التاريخ، لأنها هتستضيف لأول مرة في تاريخها جولة لونجين العالمية لأبطال قفز الحواجز، وده قدام أهرامات الجيزة.

من آلاف السنين، والخيول جزء أساسي من حكاية مصر. فقبل ما تظهر مدرجات المشجعين في مسابقات قفز الحواجز، ونقاط البطولات، والجوائز اللي بتوصل قيمتها لملايين الدولارات، كان الملوك المصريون بيتسابقوا بالعربات الحربية في الصحراء، وبيظهروا في النقوش والرسومات على جدران المعابد وهم على ظهور الخيل أو بيقودوا العربات الحربية.

بداية تاريخ مصر مع الخيول بترجع لعصر الانتقال الثاني، ومن وقتها ارتبطت بالملكية والحروب والمكانة الرفيعة. وبحلول عصر الدولة الحديثة، ظهر الحكام المصريون في النقوش والصور وهم بيقودوا العربات الحربية وبيمارسوا الصيد على ظهور الخيل، اللي احتلت مكانة بارزة في الصور والرموز الملكية.

ودلوقتي، الخيول راجعة للجيزة من تاني، لكن المرة دي مع أفضل الفرسان في العالم. ففي الفترة من 22 لـ24 أكتوبر، جولة لونجين العالمية لأبطال قفز الحواجز (Longines Global Champions Tour) هتقام في مصر للمرة الأولى، وهتكون أهرامات الجيزة واحدة من 17 محطة دولية للجولة ضمن موسم 2026.

وعلى مدار 3 أيام، الجيزة هتستضيف منافسات من فئة الخمس نجوم، بالتعاون مع الاتحاد المصري للفروسية، وده بالتزامن مع انطلاق شراكة هتمتد لخمس سنين بين الجولة والاتحاد.

واختيار الأهرامات لاستضافة الحدث مش مجرد اختيار لمكان مميز، لأن الجولة، على مدار عقدين، نجحت في تحويل رياضة قفز الحواجز لعرض رياضي مبهر، ونقلت المنافسات من ميادين الفروسية التقليدية لأشهر مدن العالم، من ميامي ومكسيكو سيتي لباريس وموناكو ولندن. وفي موسم 2026، القاهرة هتنضم لـ16 وجهة تانية موزعة على أربع قارات.

وعلى مدار الأيام التلاتة، هيتنافس الفرسان في مسارات بتضم حواجز مصممة بعناية، بهدف تحسين تصنيفاتهم الدولية والفوز بالجوائز. ومن أبرز المنافسات الجائزة الكبرى للقاهرة، وهي من فئة CSI5*، وبيوصل ارتفاع حواجز مسارها لـ1.60 متر، بينما بتبلغ قيمة جوائزها المالية 1.75 مليون يورو.

والنقاط دي ليها أهمية خاصة، لأن مع دخول بطولة 2026 مراحلها الأخيرة، كل نتيجة هتفرق في المنافسة على لقب جولة لونجين العالمية لأبطال قفز الحواجز على المستوى الفردي، وكمان ألقاب الفرق في دوري الأبطال العالمي (Global Champions League). وده بيخلي محطة القاهرة جزءًا مهمًا من المنافسة على الألقاب النهائية للموسم.

الجولة هتجمع نخبة من أبرز فرسان العالم وأكثرهم تتويجًا في رياضة الفروسية، من بينهم الألماني كريستيان كوكوك، اللي هيشارك بصفته حامل اللقب الأولمبي الفردي، بعد ما فاز بالميدالية الذهبية في أولمبياد باريس 2024.

وكمان هيشارك البريطاني بن ماهر، اللي في رصيده 3 ميداليات ذهبية أولمبية، ومواطنه سكوت براش، صاحب ذهبيتين أولمبيتين.

والقائمة بتضم كمان عددًا من الفرسان الحاصلين على ميداليات أولمبية، من بينهم ماركوس إينينغ، وسيان أوكونور، وسيمون ديليستر، ودانيال دويزر، وبيتر ديفوس. وبجانب الأبطال الأولمبيين، هيشارك في منافسات القاهرة أبطال سابقون لجولة لونجين العالمية، زي الثنائي الألماني ماركوس إينينغ ودانيال دويزر، والفارس النمساوي ماكس كوهـنر.

ومن أبرز المشاركين كمان الفارس المصري الأمريكي نائل نصار، اللي مثّل مصر في أولمبياد لندن 2012 وطوكيو 2020، وشارك في دورة الألعاب العالمية للفروسية سنة 2014، بالإضافة لمشاركته في 3 نهائيات لكأس العالم التابعة للاتحاد الدولي للفروسية.

وإلى جانب المنافسات الفردية، نصار هيشارك ضمن فريق «فراعنة القاهرة» (Cairo Pharaohs)، مع الفارس المصري سامح الدهان، والفارسة البلجيكية أنيليس فورسلفمانس، والفارس الهولندي بيم مولدر، والفارستين الأمريكيتين فاني خوسلا وزاينا رضوي.

استضافة جولة لونجين العالمية لأبطال قفز الحواجز بتأكد وجود مصر على خريطة واحدة من أرقى الجولات الدولية في رياضة الفروسية، وبتدي فرصة للجمهور اللي مش بيتابع قفز الحواجز عادةً إنه يتعرف على الرياضة دي عن قرب، ويشوف أبطال أولمبيين وفرسان عالميين بيتنافسوا قدام واحد من أشهر رموز الحضارة في العالم.

وبعد محطة الجيزة، الجولة هتتجه للرباط في المغرب، قبل ما الموسم يختتم ببطولة الأدوار الإقصائية للأبطال العالميين (GC Playoffs) في الرياض بالمملكة العربية السعودية خلال نوفمبر. ونتائج محطة القاهرة هتكون مؤثرة في المنافسة على الترتيب النهائي للجولة، في حدث بيجمع بين عظمة المكان ومستوى المنافسة الرياضية العالمية.

ولو حابب تحضر الحدث، تذاكر جولة لونجين العالمية لأبطال قفز الحواجز بالقاهرة متاحة، وتقدر تحجزها من خلال الرابط الموجود في البايو على صفحة الجولة على إنستجرام: @LGCTcairo.