مها جميل.. من الرسم في الخفاء لجداريات في كل أسوان
لما تشوف أسوان بعين فنان
دايما لما الناس بتروح تزور أسوان، بيتكلموا عن جمال طبيعتها، طيبة وكرم ناسها وجوها الحلو في الشتاء. بس مها جميل، فنانة مصرية من أسوان قررت تحاول تخلي محافظتها أجمل كمان، بأنها دخلت الفن الجداري المجتمعي في أسوان لأول مرة. "الناس فكرتها عن الجرافيتي أنه لازم يبقى سياسي، فبيخافوا منه. عندنا في أسوان كان الجرافيتي يا سياسي يا التراس، مكانتش فكرة اللوحات الجدارية المجتمعية موجودة." 
لما مها كانت في أولى فنون جميلة، كانت بتحس أن التسليمات اللي كان لازم يعملوها صغيرة أوي – بدل الواحدة كانت بترسم ييجي 13. لما شاركت ده مع زميلها علي عبدالفتاح، اللي دلوقتي بقى جوزها وشريكها في المشروع، قالها إنها عندها طاقة كبيرة اوي لازم توظفها، فأخدها سايبر وفرجها على الفن الجداري المجتمعي في بلاد تانية. ساعتها فكرة أن بنت تنزل ترسم في الشارع كانت مرعبة اجتماعيًا، بس مها كانت برضه بتنزل - بالليل متخفية، وصحابها ملمومين حواليها عشان يخبوها من الناس – بس بتنزل.
من ساعة ما بدأت ومها بترسم عشان تزين حيطان بلدها بعناصر من جمال ملامح أهلها، بترسم وجوه أسوانية أصيلة. بدأت على أسوار قصيرة، وبعدين فضلت تكبر لحد ما بقت دلوقتي بترسم مع جوزها "علي" على عماير وأبراج كبيرة. 
لما بييجوا يرسموا اللوحات الجدارية بتاعتهم، مها وعلي بيخططوا شكل كل لوحة على حسب مكانها والسياق الموجودة فيه، يعني مثلا لو مكان اللوحة جنب مستشفى هتبقى لها علاقة بالصحة، لو قريبة من النيل، ممكن يبقى فيها عناصر من القناطر أو السياحة. دلوقتي مها وعلي مش بيرسموا بس في اسوان، دول لفوا على سوهاج والقاهرة والغردقة وسفاجة والأقصر، بس الفن اللي في كل بلد ليه ملامحه وعناصره الخاصة بيه.
لما بدأت مشوارها، مها بتقول لنا انها زي "أي فنان هاوي بيبدأ" كانت بترسم بالأبيض وأسود تحت اسم "رايفن"، عشان ماتطلعش باسمها. فضلت ترسم في السر لحد ما قررت تختبر آراء أهل بلدها في اللوحات الجدارية بتاعتها. "رحت وقفت جنب أول لوحة رسمتها، وساعتها كان فيه أسرة واقفة جنبها برضه، وقعدت أقول بعلو صوتي إنها لوحة مقرفة. مسكوا فيا خناق لحد ما حسيت أنهم خلاص هيجروا ورايا ويضربوني. كانوا بيدافعوا عن فني زي ما بيدافعوا عن بلدهم."
اللي بيسعد مها في شغلها حاجتين: أنها بتجمل بلدها بأجزاء منها من غير ما تعتمد على تدخل عناصر اجنبية، وأنها بتثبت للناس إن مافيهاش حاجة لو بنتك أو ابنك كانوا بيعملوا جرافيتي - ده مش معناه أنه مشاغب أو هيدخل في مشاكل، ده مجرد نوع من الفن.
- الموضوع اللي فات تشغيل قطار من القاهرة لأسوان لنقل السودانيين الراغبين في العودة لبلدهم
- الموضوع اللي جاي "سلامتك تهمنا" مبادرة من وزارة العمل لحماية عمال الدليفري
