تصريحات ياسمين رئيس مع "الفصلة" عن مسلسلها "اسأل روحك"

ياسمين رئيس قالتلنا إن أكتر حاجة جذبتها في شخصية "غزالة" هو إنها بتشتغل بيّاعة ورد وغلبانة جدًا، لكن في نفس الوقت الجمهور هيحتار في أمرها دايمًا والحيرة دي هي أكتر حاجة شدتها للدور. 

سألنا ياسمين إيه الحاجة اللي اكتشفتها في نفسها خلال شغلها على الشخصية دي، وقالتلنا: "دايما الشخصيات اللي بجسدها بتظهِر جزء من نفسي مكنتش أعرفه عن “ياسمين”، وخلال تجسيدي لـ “غزالة” اكتشفت إني بحب الورد.. وممكن أبقى زي غزالة أحب أفتح كشك ورد في يوم".

ياسمين رئيس بتقدم خلال مسلسل "اسأل روحك" أكتر من شخصية مختلفة، ودي حاجة مش سهلة على الممثل. حكيتلنا ياسمين إزاي قدرت تجسد 4 شخصيات في عمل واحد، فقالت: "بالنسبالي أكتر حاجة ممتعة في "اسأل روحك" هو إني بقدم 4 شخصيات مختلفة، كل شخصية ليها كلامها ولبسها وتفاصيلها وحركاتها، ودي حاجة تجذب أي ممثل، بتاخد مني مجهود بس ممتعة لأبعد حد" 

مسلسل اسأل روحك

بيشارك في بطولة مسلسل اسأل روحك ياسمين رئيس، أحمد فهمي، داليا مصطفى، إسلام جمال، آية سليم، أحمد عبد الله محمود، نهال عنبر، ندى السبكي، وغيرهم، والمسلسل من تأليف محمد الحناوي، وإخراج أسامة عرابي، وبتدور أحداث المسلسل في إطار الغموض والتشويق.