حوار مع المؤلف صلاح الجهيني

وقال صلاح الجهيني عن مسلسل "الأمير": "كاست مسلسل "الأمير" كبير و ضخم جدًا لأنه بخلاف النجوم المصريين الكبار زي أحمد عز وأمينة خليل فيه نجوم عالميين كبار زي توبا بوكسيتن ومريم أوزرلي، واللي ساعد على ده هو شكل المسلسل وطريقة بناء الحلقات خلت في مساحة لمشاركة النجوم دول، والمسلسل بيتصور حاليًا ما بين السعودية وتركيا وبعض الدول الأوروبية".

وكمّل وقال عن المسلسل: "مسلسل "الأمير" من فكرة المستشار تركي آل الشيخ، ومن بداية معرفتي بيه وهو كان بيحلم إنه يقدم مسلسل عربي بمواصفات عالمية سواء في طريقة التصوير أول الإخراج أو إيقاع الأحداث والحلقات، و الحقيقة هو متفرج شَرِه جدًا للمسلسلات الاجنبية".

"صلاح الجهيني" من بداياته ولحد النهاردة وهو مركز في الجانب السينمائي بشكل كبير، سألناه على ده وقال إن الموضوع صدفة نوعًا ما، لكن هو عموما حتى لما بيكتب مسلسل بيقصد يكون إيقاعه سينمائي وسريع زي المسلسلات اللي بيحبها لكن ده بيبقى شبه مستحيل إنتاجيا في المسلسلات الرمضانية اللي أحداثها بتدور في 30 أو 15 حلقة.  

وده بظبط عكس اللي بيحصل في مسلسل "الأمير" واللي شجعني عليه هو ميزانيته الكبيرة ومساحتي في تسريع الإيقاع. 

وعن علاقته بالمخرج طارق العريان، قال "الجهيني": التوافق بين المخرج و الكاتب مهم جدًا سواء في الذوق السينمائي بتاعهم أو في فهمهم لطبيعة الفيلم اللي هيعملوه سوا، لأن لو ده مش حاصل ممكن المؤلف يبقى كاتب حاجة والمخرج ميشوفهاش بنفس الطريقة، وأنا الحقيقة كنت محظوظ في العمل من بداياتي مع أستاذ طارق لأنه مدرسة سينمائية كبيرة أنا اتعلمت منها كتير سواء في التعامل مع الكتابة أو الإنتاج أو توقع رد فعل الجمهور واستقابله للي بنقدمه.

ومن المشاريع اللي مستنينها لـ "صلاح الجهيني"، فيلم "فرقة الموت"، اللي وصفه "الجهيني" بـ إنه أفضل سيناريو هو كتبته لأنه نتاج سنين خبرة، وقال: "الحقيقة كل صناع الفيلم عندهم خبرة كبيرة وده هيخليه فيلم متميز جدا، الفيلم اتصور منه فوق الـ 90%".

وانهى "صلاح الجهيني" حواره معانا برأيه في الظروف الإنتاجية الحالية في مصر، وقال: "مقولة إن العمل الفني "لازم يقدم رسالة" مش بسمعها غير في مصر، الفن مش مطلوب منه إنه يقدم رسالة لكن مطلوب منه إنه يسيب انطباع و حالة نفسية عند المشاهد، والظروف الانتاجية حاليًا فيها أزمة كساد كبير بيواجهه العالم من بعد فيروس كورونا في نفس الوقت اللي المنصات والقنوات التليفزيونية ابتدوا يقدموا فيها مسلسلات بمستويات عالية.