حوار مع رنا أبو الريش مؤلفة مسلسل "اتنين غيرنا"

علشان كدة عملنا حوار مع رنا أبو ريش مؤلفة مسلسل "اتنين غيرنا"، اللي قالتلنا إنها مش بتصنفه كـ رومانسي بس، لكن رحلة تعافي لاتنين بيتعكزوا على بعض، اتنين بيتقابلوا في أكتر وقت وحش وحرِج في حياتهم وبيحاولوا يتخطوا علاقة قديمة، بيبدأوا يساندوا بعض ويكونوا "طوق النجاة" لبعض.

سألنا "رنا" في البداية عن سبب اختيارها للكتابة عن حياة الممثلات في "اتنين غيرنا"، وقالت: "الممثلات غلابة جدًا ومستباحين، وفي شعور من المجتمع إن الممثلة دي بتاعتنا ونقول اللي إحنا عايزينه ونخوض في الأعرض ونطلع إشاعات براحتنا، وبينسوا إنها بني أدم لحم ودم وبتتوجع".

وقالت رنا إنها من زمان كانت عايزة تتكلم عن معاناة الراجل بعد الطلاق، وقالت: "بقالي كتير عايزة أسلط الضوء على معاناة الراجل بعد الطلاق لأننا دايمًا بنحكي بس عن الستات وبنملى المسلسلات بمعاناتهم، ومش بنتكلم عن وجع الراجل وإزاي بيعاني في صمت ومن غير ما يقدر حتى يعيط"

رنا قالت إنها كانت مهتمة ببناء كل شخصية لوحدها، وعدد الشخصيات الكتير مرهق لكن هي متعودة عليه من وقت "كامل العدد"، كل شخصية ليها قصتها مش مجرد بتدور في فلك الشخصيات الرئيسية، وكتبت "الشلة" بطريقة تخلي كل حد يحس إن دي شلته في الحقيقة فعلًا

شخصية "شهيرة" أو "شوشو" من أكتر شخصيات المسلسل اللي حبيناهم ووحبينا خفة دمها وصراحتها، واللي بيجسد دورها "فدوى عابد"، رنا أبو الريش حكتلنا أكتر عنها وعن كواليس كتابتها، وقالتلنا: " شهيرة هي شبه "فدوى عابد" في الحقيقة، وأنا بكتبها كنت طول الوقت بضحك، فدوى عابد أول ما قرأت الورق قالتلي أنا شهيرة مع صحابي وفي حياتي الطبيعية، طبيعية وبتتكلم بـ لسانها هي ومش بتذوق الكلام وبتقول مصطلحات غريبة بتاعتها هي.

رنا قالتلنا إنها فخورة بالاكتشافات اللي اكتشوفها السنادي في المسلسل، زي الممثل "أحمد حسن" و"تامر أمين" اللي جسدوا شخصيات "مروان وسامح"، و"صابرين النجيلي" كانت مفاجأة المسلسل بالنسبالهم، هي مكنتش بتفكر في التمثيل و"رنا" راحت طلبت إنها تتعرف عليها في فرح قبل كدة عشان حسِت إنها موهوبة، ورشحتها في دور مساعدة "نور" وأبهرتهم كلهم بأدائها.

رنا حكتلنا إنها ناقشت العنف الزوجي اللي بتتعرضله كتير من السيدات لأنها حست إن دورها لما تحكي عن طبقة C إنها ترصد الواقع وتقول الستات الشقيانة بيعانوا قد إيه من ضرب وإهانة أزواجهم وإنهم كمان بيصرفوا عليهم، وظهور رقم الخط الساخن لمكتب شكاوى المجلس القومي للمرأة كان اقتراح المنتج "محمد السعدي".

كلنا اتفعالنا جدًا مع مشهد "حسن ونور" وهو بيسيبها وزعلنا عليها، وكان لازم نعرف رأي رنا في المشهد ده، قالتلنا: "حسن" صعبان عليا ومتفهمة وضعه لما قرر يسيب "نور" لأنه كان مضغوط عليه وكان بيبعت الرسالة وهو بيعيط، قلبه مفتور على ابنه وخايف يدمر نفسيته ولازم يختار بين سعادته هو أو سعادة ابنه.

في ظل مسلسلات رمضان المليئة بالحبكات الدرامية المعقدة، مسلسل "اتنين غيرنا" قدر يكون "الركن البعيد الهادي" زي ما ناس كتير وصفته، و"رنا" قالتلنا: "مبسوطة بـ إن المسلسل هادي وطلع زي ما كنت حبّاه، حتى لو مسلسلات رمضان متعارف عليها بحاجات معينة فـ أنا هفضل أكتب اللي بحبه بدون ضغط من المجتمع أو فرض قضايا معينة عليا.. أنا باصّة في ورقتي". 

كـ مؤلفة ست، قدرت رنا أبو الريش إنها تعبّر عن معاناة الراجل المطلق من خلال تجارب ناس حواليها ولأنها كانت حريصة على إنها توضح إن الطلاق موجع للست والراجل اللي إحساس الرفض بيدمره وساعات بننسى إن هو إنسان زي الست.

المسلسل تفاعل معاه الجمهور بشكل كبير ودايمًا بنشوف تعليقات وميمز بتتعمل على المسلسل، ورنا قالتلنا على ده: "كلنا حبينا جدًا تفاعل الجمهور مع المسلسل وبنتابع كل الميمز اللي بتتعمل عليه، ومبسوطة إن "نور وحسن" بقوا جزء من عيلة الجمهور وحبينهم، وأكتر ميم ضحكني وهما بيقولوا لـ "يوسف" "خُد أمك وارجعوا أمريكا".