بداية تنفيذ منظومة التتبع الدوائي في نوفمبر 2025
لمواجهة الغش والسوق السوداء
الدكتور علي الغمراوي، رئيس هيئة الدواء المصرية، أعلن إن الهيئة بدأت أول خطوة في تنفيذ منظومة التتبع الدوائي، واللي هيتم تفعيل المرحلة الأولى منها في نوفمبر الجاي.
وده ضمن خطة طويلة هتستمر من 3 لـ 5 سنوات، بهدف ضبط سوق الدواء، ومكافحة التهريب والغش، وتحقيق الشفافية في سلاسل الإمداد الدوائي.
منظومة التتبع الدوائي ببساطة دورها تتابع كل عبوة دواء بـ QR Code، من لحظة الإنتاج لحد وصولها للمريض، وده لمواجهة المخالفات، وضمان توافر الأدوية بشكل منظم وآمن.
والتتبع بيكون لمتابعة عملية التصنيع من حيث المكونات والجودة ومطابقة المعايير، لحد بقى خروج الدواء من المصنع للموزع للصيدلية للمريض.
وفي حالة اكتشاف إن في دواء ناقص أو اختفى أو حصل فيه عملية غش هيئة الدواء بتعرف تحدد مكانه عن طريق التتبع، وبتقوم بعمل إجراءاتها.
وكمان المنظومة هيكون ليها دور في القضاء على الأدوية المقلدة أو المهرَّبة، ومنع الاحتكارات والسوق السوداء، وبكده هيئة الدواء هتعرف الأصناف المتوفرة في الأسواق، والأصناف الناقصة في السوق.
- الموضوع اللي فات محافظ الجيزة: إيقاف العمل الميداني لعمال النظافة بساعات الذروة الحارة
- الموضوع اللي جاي بينالي القاهرة الدولي لفنون الطفل هيبدأ 12 أغسطس بقصر الفنون
