محمد دياب أعلن عن فيلمه الجديد The Note من إنتاج نتفليكس

وقال محمد دياب خلال لقاءه على قناة Modern mti TV: أنا نفسي أعمل أفلام إنسانية أكتر من أعمال الأبطال الخارقين، دي النوعية اللي بحبها زي أفلامي 678 واشتباك بس في أمريكا.

وكمّل محمد دياب: "وده المشروع اللي أنا شغال عليه دلوقتي، هعمل فيلم اسمه  The Note فيلم أمريكي إنتاج نتفليكس، وقصة الفيلم فيها جزء من قصة حياتي وتجربتي في أمريكا والانبهار بالحلم الأمريكي لغاية ما تحس إنه مش حقيقي."

كمان اتكلم محمد دياب عن فيلمه الأخير "أسد" واللي هيتعرض قريب في السينمات، وقال: "محمد رمضان كان داخل المشروع ده وبيعمل كل حاجة عشان ينجحه، والفيلم ده بيتعمل من 6 سنين والمشروع غالي جدًا وإنتاجه اتكلف ما بين 300 و400 مليون جنيه، وفي وقت معين ماكنش ينفع باسمي أنا أو اسم محمد رمضان إن يتحطله الفلوس الكتير دي، فهو اتعمل دلوقتي في التوقيت المناسب.

وتابع محمد دياب: الفيلم أحداثه بتدور في القرن التاسع عشر بعد عصر محمد علي بشوية، والفيلم أحداثه بتدور في وقت زمني حقيقي وأحداثه حقيقية بس القصة نفسها مختلقة، وقصتنا بتتكلم عن عالم تجارة العبيد.

فيلم أسد هيتعرض في السينمات في مصر يوم 14 مايو، وبيشارك في بطولته محمد رمضان، رزان جمال، ماجد الكدواني، علي قاسم، محمود السراج، وهو من إخراج محمد دياب.