وزارة الثقافة أطلقت أبليكيشن "ذاكرة المدينة"

الدكتور أحمد فؤاد هنو، وزير الثقافة، أعلن عن إطلاق أبليكيشن "ذاكرة المدينة" على الموبايلات، اللي هدفه يوثق تاريخ المدن المصرية، وده ضمن مشروعات سلسلة ذاكرة المدينة اللي أطلقها الجهاز القومي للتنسيق الحضاري برئاسة المهندس محمد أبو سعدة، بالتعاون مع مركز المعلومات ودعم اتخاذ القرار بمجلس الوزراء.

و"هنو" قال إن مشروعات سلسلة ذاكرة المدينة، قدرت إنها تنقل فكرة التنسيق الحضاري لكل بيت بالمشروعات، اللي نقلت التوثيق من الحجر لـ توثيق البشر، وده أضاف قيمة للحجر وخلاه واقع حي عايش دايمًا حتى بعد رحيل مبدعيه.

ورئيس الجهاز وضح إن أبليكيشن "ذاكرة المدينة" بيضم مشروع "عاش هنا"، اللي بيوثق الأماكن اللي عاشت فيها الشخصيات اللي أثرت في الحياة المصرية في كل المجالات، وكمان مشروع "حكاية شارع" اللي بيوثق الشوارع المصرية اللي بتحمل أسماء رموز أثرت في الحياة المصرية. بالإضافة إن الأبليكيشن بيوثق العمارات والعقارات التراثية اللي سجلها الجهاز في سجلات الحصر، وبيضم إصدارات الجهاز من الكتب اللي بتوثق الأماكن المميزة اللي ليها طراز معماري فريد زي: كتاب الزمالك.. القيمة والتاريخ، وجاردن سيتي، وواحة سيوة، ومصر الجديدة.

هتلاقي على الأبليكيشن كمان مشروع الجولات التراثية اللي بيقوم بيها الجهاز للمناطق المتميزة لإلقاء الضوء على تنوعها المعماري وثرائها الثقافي والاجتماعي والسياسي والاقتصادي، كمان الشخصيات المهمة لحفظ وتخليد رحلتهم التراثية الثرية بالعطاء، ونقل سيرهم للأجيال الحالية. الأبليكيشن موجود باللغتين العربية والإنجليزية، وتقدر تبحث فيه من خلال الأسماء أو المناطق أو رقم التوثيق، وتقدر تحمله من على جوجل بلاي أو آب ستور.