كاتدرائية ميلاد المسيح بالعاصمة الجديدة أكبر كاتدرائية بالشرق الأوسط

في قلب العاصمة الجديدة، هتشوف مش مجرد كنيسة كبيرة، أنت هتشوف كاتدرائية ميلاد المسيح، الكاتدرائية الرئيسية في العاصمة الجديدة، وأكبر كاتدرائية في الشرق الأوسط، بس قبل أي ألقاب وأرقام خليني احكيلك عن الإحساس الروحاني اللي بتوصله الكاتدرائية لأي حد بيدخلها.

الافتتاح التاريخي:

الحكاية بدأت في يناير 2018، وقت قداس عيد الميلاد، بحضور الرئيس عبد الفتاح السيسي، وقتها تم الافتتاح الجزئي، بافتتاح الكنيسة الصغرى. وبعدها بسنة تقريبًا، وتحديدًا يوم 6 يناير 2019، اتفتح الصرح كله رسميًا، وبقت الكاتدرائية واحدة من أهم معالم العاصمة الجديدة.

ومن ساعتها، وهي مرتبطة باحتفالات عيد الميلاد المجيد، لأن البابا تواضروس الثاني – بابا الإسكندرية وبطريرك الكرازة المرقسية – بيصلي قداس عيد الميلاد فيها كل سنة وبيكون موجود عدد كبير من الأساقفة والمطارنة والشماسين، ودايمًا ما بيكون الرئيس عبد الفتاح السيسي حريص على التواجد وتهنئة أقباط مصر بمناسبة أعياد الميلاد. وكمان بيكون حاضر عدد كبير من الوزراء ورموز الدولة.

الكاتدرائية مبنية على مساحة 15 فدان، يعني حوالي 63 ألف متر مربع، وتقدر تستوعب حوالي 8200 شخص. 

وهي بتضم كنيستين، كبرى وصغرى، وقاعة مناسبات رئيسية، وقاعتين فرعيتين، وغرف للتعميد، واستراحة، وغرفة تحكم. كمان في مبنى الكاتدرائية والمقر البابوي، وكنيسة الشعب، ومسرح مفتوح.

وحتى التفاصيل الخدمية متفكر فيها، من جراج من طابقين تحت الأرض، ومبنى خدمات، وأسوار خارجية بثلاث بوابات رئيسية وبوابة فرعية، عشان المكان يعيش ويستقبل ناس طول الوقت.