"أرشيف الإسكندرية" أطلق أبليكيشن لتوثيق تاريخ المدينة على Google Play

"أرشيف الإسكندرية" بقى متاح دلوقتي من خلال أبليكيشن بنفس الاسم على Google Play وقريب على App Store، وده بعد ما بدأ كمبادرة في سبتمبر 2023 على إيد إسلام علي وفريق من المتطوعين هدفهم توثيق تاريخ المدينة والحفاظ على تفاصيلها اللي بتختفي مع الوقت، بجانب تسجيل حاضرها وإبراز جمالها.

الأبليكيشن بيقدم أرشيف رقمي بيضم صور نادرة ووثائق ومخطوطات، وجولات سياحية تساعد المستخدم يكتشف المدينة من زاوية مختلفة، وينشر صوره وفيديوهاته ويشارك يومياته، مع إمكانية إرسال رسائل صوتية وصور وملفات ومستندات من خلال الشات الموجود في الأبليكيشن.

وبيضم الأبليكيشن كمان "متجر الأرشيف" لدعم الصناع المحليين وأصحاب المنتجات الفنية والحرف اليدوية، بحيث يقدر المبدعين يعرضوا أعمالهم ويتواصلوا مع المهتمين بشرائها، كمان الأرشيف بيقدم مساحة للفنانين والكتاب والمصورين وصناع الحرف اليدوية لعرض أعمالهم وإنشاء معارض خاصة بيهم.

ومن أبرز المميزات كمان Alexandria AI Studio، اللي بيسمح للمستخدمين بتوليد وتخيل صور تاريخية وفنية لشوارع ومعالم الإسكندرية باستخدام أدوات الذكاء الاصطناعي.

وتقدر تعرف أكتر عن مبادرة "أرشيف الإسكندرية" من خلال حوارنا مع إسلام علي، مؤسس الأرشيف، من هنا: https://elfaslaonline.com/short/75446، وتقر تحمل أبليكيشن الأرشيف من هنا.

الصورة للإسكندرية سنة 1984 ضمن صور الأرشيف