ترميم النسخة المكسيكية من فيلم "زقاق المدق" بطولة سلمى حايك

النسخة المرممة من الفيلم هتتعرض في ختام قسم الأفلام الكلاسيكية من النسخة الـ 73 من مهرجان سان سيباستيان السينمائي الدولي بإسبانيا، في الفترة من 19 لـ 27 سبتمبر، وده احتفالًا بمرور 30 سنة على عرضه أول مرة سنة 1995.

النسخة الجديدة من الفيلم اترممت  بتقنية 4K على مدار 4 سنين، وده للحفاظ على التفاصيل البصرية والأصالة الفنية، والفيلم يعتبر هو البداية الحقيقية لمسيرة سلمى حايك واللي بقت بعدها واحدة من أهم نجمات هوليوود، وشاركها في بطولة الفيلم عدد من النجوم المكسيكيين زي برونو بيشر، ودانيال جيمينيز كاتشو، وخوان مانويل بيرنال، وإرنستو غوميز، وكروز، وماريا روخو، وتياري سكاندا، ومارجريتا سانز.

رواية "زقاق المدق" سبق وقدمتها شادية كفيلم من بطولتها في السينما المصرية في الستينيات، وشاركها في البطولة يوسف شعبان، وصلاح قابيل، وحسن يوسف، وسامية جمال، وعقيلة راتب، وإخراج حسن الإمام، وسيناريو وحوار سعد الدين وهبة.

والنسخة العربي من الفيلم بتحكي عن حميدة البنت اليتيمة اللي بتتمنى تكون غنية وبتتخطب لحلاق الزقاق عباس الحلو اللي بيقرر يسافر عشان يكسب فلوس أكتر، ولكن بعد سفره بيقوم قواد محترف بإغواء حميدة، عشان تبدأ حياة جديدة بعيدة عن عباس وأهل الزقاق، ولكن عباس مش بيقبل بالوضع ده وبيقرر الإنتقام.