"مصريبثيكس".. فريق بحثي بجامعة المنصورة اكتشف نوع جديد من أسلاف القردة

فريق بحثي مصري من جامعة المنصورة نجح في اكتشاف نوع جديد من القردة العليا القديمة في شمال مصر، أطلقوا عليه اسم “مصريبثيكس موغراينسيس”، وده بيعتبر أول دليل حفري واضح على وجود أسلاف القردة العليا في شمال إفريقيا.

الحفرية تم العثور عليها في وادي المغرة، بترجع للعصر الميوسيني المبكر من حوالي 17 لـ18 مليون سنة قبل الميلاد، وده بيغير الفكرة السائدة إن القردة العليا بدأت في شرق إفريقيا بس، وبيشير إن شمال إفريقيا والشرق الأوسط كان ليهم دور أساسي في نشأتها.

الاكتشاف اعتمد على بقايا فك سفلي وأسنان، واللي أظهرت خصائص مميزة بتوضح إن الكائن ده كان قريب من القردة العليا الحديثة، وكان نظامه الغذائي بيعتمد على الفواكه وكمان أطعمة صلبة زي المكسرات والبذور.

الدراسة كمان رجّحت إن المنطقة دي ممكن تكون مركز رئيسي لنشأة القردة العليا، مش مجرد ممر جغرافي زي ما كان معتقد قبل كده.
وده بيفتح باب جديد لفهم تطور الإنسان والكائنات القريبة منه، بعد ما كان السجل الأحفوري للقردة العليا في العصر الميوسيني مقتصر بشكل أساسي على شرق أفريقيا خصوصاً في كينيا وأوغندا، بينما كانت مواقع شمال أفريقيا مقتصرة على بقايا القرود الأخرى.

كمان الإنجاز اتنشر في مجلة Science وبقى أول بحث علمي يُنشر في المجلة بقيادة مصرية كاملة ومن داخل جامعة مصرية (جامعة المنصورة) ومن خلال باحث رئيسي مصري وبتمويل مصري، وهو إنجاز غير مسبوق في تاريخ البحث العلمي في مصر.

جدير بالذكر إن الإنجاز العلمي تم تحت قيادة الدكتور هشام سلام مؤسس مركز الحفريات العقارية بجامعة المنصورة، المؤلف الرئيسي للدراسة، وفريق علمي من الجامعة من ضمنهم الدكتورة شروق الأشقر الباحثة الرئيسية في الدراسة.