وزارة الصحة أطلقت أول برنامج لتأهيل "مسؤولي إشراك المرضى"

وزارة الصحة أعلنت عن إطلاق أول برنامج تدريبي لتأهيل "مسؤولي إشراك المرضى" في القطاع الصحي، بالتعاون مع منظمة الصحة العالمية، واللي اسمه (PERO - Patient Engagement Responsible Officer).
البرنامج ده جزء من خطة الوزارة لتطوير جودة الخدمات الصحية، وكمان لترسيخ فكرة إن "المريض شريك في الرعاية"، مش مجرد متلقي للخدمة.

الدكتور حسام عبدالغفار، المتحدث باسم الوزارة، قال إن الهدف من البرنامج إن المريض يبقى ليه دور حقيقي في القرارات اللي تخص علاجه وتجربته داخل المستشفيات.

وقال إن التعاون مع منظمة الصحة العالمية بيثبت إن مصر ماشية بخطى ثابتة ناحية تطبيق أحدث النظم العالمية في مجال سلامة المرضى والرعاية اللي بتركز على احتياجاتهم.

أما الدكتور محمد حساني، مساعد وزير الصحة لشؤون المبادرات، فوضح إن البرنامج خطوة مهمة جدًا لتطوير منظومة سلامة المرضى على مستوى الجمهورية، وبيهدف لتجهيز كوادر مؤهلة تعرف إزاي تفعّل دور المريض وأسرته في تحسين جودة الخدمة الصحية، ضمن رؤية "مصر 2030".

الدكتور جلال الشيشيني، رئيس الإدارة المركزية لجودة الرعاية الصحية، أضاف إن البرنامج ده نقلة حقيقية في مفهوم الجودة، لأنه بيزرع الثقة والمشاركة بين المريض وفريق العلاج، وبيقلل من المخاطر داخل المنشآت الصحية.
المرحلة الأولى من التدريب بدأت في محافظات القناة وشمال سيناء، وشارك فيها 25 متدرب يمثلوا أول دفعة من مسؤولي إشراك المرضى المعتمدين، واللي هيبدأوا يطبّقوا المفهوم ده في مؤسساتهم.

الدكتورة مروة السيد، مديرة إدارة سلامة المرضى، قالت إن ده مجرد بداية، ولسه فيه سلسلة تدريبات جاية في كل المحافظات، عشان يتم نشر ثقافة سلامة المرضى وتشجيع الكوادر الصحية على إشراك المواطنين كشركاء حقيقيين في الرعاية الصحية.

الصورة من مستشفي 57357