النسخة الـ 25 من مهرجان الإسماعيلية للفنون الشعبية من 24 لـ 30 أكتوبر

أول فعاليات المهرجان هتبدأ يوم الجمعة 24 أكتوبر، بعرض الديفيليه للفرق المشاركة الساعة 5 مساءً قدام مبنى ديوان عام المحافظة القديم في شارع محمد علي. وبعدها تاني يوم السبت 25 أكتوبر، هيكون حفل الافتتاح الساعة 8 مساءً في المسرح الروماني بالطريق الدائري، واللي هيستضيف كمان حفل الختام يوم الخميس 30 أكتوبر.

السنة دي المهرجان هيجمع فرق مصرية من محافظات مختلفة زي: الشرقية، أسوان، الإسكندرية، التنورة، الوادي الجديد، المنيا، أسيوط، حلايب، الإسماعيلية، وكمان فرقة من ذوي الهمم.

هيكون فيه عروض خاصة لـ فرقة رضا والفرقة القومية للفنون الشعبية، ومعاهم فرق عربية وأجنبية من بولندا، رومانيا، الهند، سريلانكا، أوزبكستان، الأردن، الجزائر، فلسطين، غينيا، لبنان، تونس

الفنان ماهر كمال، مستشار المحافظ للفنون ومدير المهرجان، قال إن الدورة الجديدة هيكون فيها فعاليات متنوعة بيتم التحضير ليها حاليًا علشان تخرج بشكل منظم ومناسب لاسم الإسماعيلية ووزارة الثقافة.

ووضح أشرف سليمان، مدير إدارة السياحة، إن العروض هتكون في أكتر من مكان داخل المدينة زي حديقة الشيخ زايد، حديقة الخالدين، نادي الدنفاه، نادي الأسرة، ومسرح الجلاء، بجانب عروض في المراكز والمدن زي شاطئ الزهور بفايد، مركز شباب القصاصين، ومركز تحسين البيئة بالقنطرة غرب.

اللي يمكن ناس كتير متعرفوش إن مهرجان الإسماعيلية للفنون الشعبية بدأ سنة 1985، واتوقف كذا مرة بسبب ظروف مختلفة، وهو واحد من أهم المهرجانات اللي بتحتفي بالفنون الشعبية في مصر والعالم.

الصورة من فرقة رضا