"بسيطة لايف".. حكاية منصة بتدعم الفنون من خلال عرضها أونلاين

العدالة الشعرية بتقول إن اللي بيروح ما بيرجعش، بس أوقات الواقع بيبقى عنده طريقة يغير بيها النهايات، وفي قصتنا اللي غيرت النهاية هي "بسيطة لايف". المنصة اللي قررت توقف الزمن شوية، وتخلي الفن دايمًا قريب. مش مجرد موقع بيبث حفلات أو مسرحيات وبس، لكن دي مساحة بتوصل الفنان بجمهوره مهما كانت المسافة.

"بسيطة لايف" بتحاول تخلي الفن أقرب، بدعم الفنانين المستقلين عشانيعرضوا فنونهم المختلفة من أفلام، ومسرحيات، وعروض الموسيقى، بشكل أونلاين يقدر بيه الجمهور يشوفها من أي مكان في العالم.

بدايات مش بسيطة لـ "بسيطة لايف":

وقت الكورونا، وفي لحظة وقف فيها العالم -إن جاز التعبير نقول لحظة- قررت ريم قاسم إنها ماتقفش.

ريم كانت وقتها بتعمل دكتوراه عن توثيق الفنون في مصر، ولما لقت العالم كله بقى "أونلاين"، بدأت تسأل نفسها ليه الفن مايكونش كده كمان؟ ومن السؤال ده، اتولدت "بسيطة لايف".

"كنت بعمل PhD أوثّق فيه الفنون في مصر، ووقتها جات الكورونا. أول ما عرفت إنها هتطوّل، بدأت أفكر إزاي أتعامل مع ده. بالنسبة لي المحتوى الثقافي زيه زي المحتوى الفني، يستحق الدعم. ومن هنا بدأت فكرة بسيطة."

ريم قاسم مؤسسة منصة "بسيطة لايف"

وبما إن برهان الفكرة الناجحة بيبان بالتجربة، فـ "بسيطة لايف" من أول يوم بدأت فيه، قدرت تثبت مكانتها كسوق جديد للفنانين المستقلين. سوق قادر يحقق نجاح كبير ويتشاف من البيت عن طريق شاشة صغيرة بس يسيب نفس الإحساس كأن الفنان سامع تسقيف الناس حتى لو بينهم مسافة. 

"الناس كانت شايفة إن دي حاجة جديدة إزاي يدفعوا لمحتوى اونلاين؟، بس مع ذلك كانوا بيقولوا خلينا نجرب هنخسر إيه كده كده كل حاجة مقفوله."

ريم قاسم مؤسسة منصة "بسيطة لايف"

الفن حق مش مسألة بسيطة:  

"بسيطة لايف" في خلال 5 سنين بس قدرت تعمل تعاونات مصرية وعربية وكمان عالمية، تعاونات في مجالات الموسيقى، والمسرح، والرقص، وعروض حكي، وغيرها. 

زي تعاونها لعرض أفلام مهرجان الإسكندرية للسينما الخضراء، ومهرجان المنيا الدولي للمسرح، ومهرجان أيام قنا السينمائية. 

"أكتر تعاون اتبسطت بيه لما كنا بنبث حفلات الساقية لايف، فكرة إنك قاعد برة مصر وبتشوف حفلة في الساقية كان شعور لا يقارن.

ريم قاسم مؤسسة منصة "بسيطة لايف"

وسنة ورا سنة و"بسيطة لايف" اتحولت من وسيلة عرض، لنظام دعم متكامل للفنانين. بتوفر ليهم وسيلة آمنة لبث عروضهم، وتنظيم التذاكر أونلاين، وحماية حقوقهم الرقمية، وكمان فرصة للوصول للجمهور من أماكن مختلفة في العالم.

من البث للدعم: "زمالات بسيطة"

وزي ما بسيطة كانت مصدقة في حلمها، هي كمان صدقت في حلم كل فنان، وشافت إن دورها تدعم الفنانين بشكل أكبر وأعمق. ومن هنا اتولد مشروع "زمالات بسيطة".

"زمالات بسيطة" مشروع بيختار عدد من الفنانين المتخصصين في فنون الأداء وبيوفر ليهم ورش وتدريبات اتصممت على حسب احتياجات كل فنان بشكل منفرد، وده عشان يطور أداءه، ومع نهاية الزمالة، الفنان بيقدّم عرض في مهرجان باب البحر اللي بتنظمه المنصة.

"بنختار الفنانين اللي بيكونوا في نص مسيرتهم خلاص أثبتوا موهبتهم وجديتهم، لكن لسه محتاجين الزقة اللي تخليهم يكملوا الطريق."

ريم قاسم مؤسسة منصة "بسيطة لايف"

"بسيطة لايف" مش بس ساعدت الفنانين، لكنها كمان علّمت جمهور جديد إن الفن يستحق الدعم والمشاهدة، حتى لو من شاشة صغيرة.

فلو بتحب الفن، دلوقتي دورك تبدأ من هنا: ادخل على basita.live، أو أبليكيشن Basita.Virtual وتابع الحفلات والعروض من أي مكان في العالم.

أما بقى لو أنت فنان فتقدر تثبت أنك جدير بموهبتك لأن المنصة بتستقبل مشاريع في كل مجالات الفنون من موسيقى، ومسرح، ورقص، وعروض حكي، وحتى تجارب فنية معاصرة.

في النهاية، يمكن فعلًا اللي بيروح ما بيرجعش، بس "بسيطة لايف" عرفت توقف اللحظة عشان دايمًا في لحظات تستحق إنها تفضل حية حتى بعد ماتنتهي.