في "طالع نازل".. إزاي "داليا" ورّتنا إن الحياة بعد الفقد في النازل

في مسلسل "طالع نازل" ووسط ملحمة الانتقام اللي بتقدمها "نورا" اللي بتجسدها منى زكي، بنشوف على جانب تاني "داليا" الأم لطفلين والأرملة الهادية والبسيطة، لكنها بتلفت نظرنا.

عشان كده، كان لازم نتكلم مع هاجر حاتم، اللي بتقدم دور "داليا" ونعرف منها أكتر عن تفاصيل وتحضيرات الشخصية اللي وصفتهالنا بـ "قليلة الحيلة".

في البداية هاجر قالتلننا إنها راحت الأوديشن عشان تعمل دور شخصية تانية، لكنها طلعت مش شبه الدور، وبعد شهر كامل، ورغم إن تصوير المسلسل بدأ، بيرجع يكلمها المخرج هاني خليفة لكن المرة دي عشان تعمل أوديشن على دور "داليا".

"أوديشن "داليا" ماكنش سهل خالص، كان مشهد المطبخ، والمفروض إن هي بتنهار في الآخر، وهاني خليفة كان حاضر بنفسه المشهد فكنت حاسة بضغط، وبعد ما خلصت قال لي انتِ معانا، وماكنتش اعرف أنه مسلسل منى زكي.

هاجر حاتم، ممثلة

"أنا عارف إنك مش أم .."

اجتهاد هاجر وتحضيراتها للدور، هي اللي خلته يلفت نظرنا ويعلق مع الجمهور، لدرجة إن ناس كتير قالت إن "داليا" شبه ستات كتير نعرفها، والشخصية دي مش كتير الدراما بتتكلم عنها، رغم أنها تستحق مسلسل لوحدها. وده كله ماكنش صدفة لأن قصاده مجهود كبير عملته هاجر، زي مثلا إنها عملت هيستوري كامل لجوزها "نادر" رغم أنه مش بيظهر في المسلسل خالص، وده وزي ما قالت لنا كان عشان لما تقول "نادر جوزي الله يرحمه" تبان جملة مشبعة مش كأنها بتتكلم عن اي حد وخلاص، كمان هيستوري لأولاد "داليا" الاتنين كتبت فيه كل حاجة تخصهم وعنهم عشان مشاعر الأمومة تبان حقيقة.

ومن ناحية تانية، توجيهات هاني خليفة كانت حاضرة، فكان بيقولها إن "داليا" هي بلسم المسلسل اللي بتمتص غضب الكل وعصبية حماتها، فهي غلبانة وطيبة وقليلة الحيلة.

"في المشهد اللي كنت هسيب ولادي وهتجوز في إسكندرية، هاني خليفة قالي انا عارف انك مش أم بس "داليا" دلوقتي هتكون حاسة بكذا وكذا، فكان بيديني مفاتيح عشان أفهم الشخصية".

هاجر حاتم، ممثلة

كمان هاني خليفة هو اللي حدد شكل "داليا" وطلب أنها تكون بشعر كيرلي منكوش عشان تكون شبه الناس، ومن كتر اهتمامه بتفاصيل الشخصية كشكل وتمثيل، هاجر قالتلنا انه كأنه بيعمل "Scan" لـ "داليا" لما بتدخل اللوكيشن.

"ست قليلة الحيلة"

وزي مشاهد كتير علقت معانا، والجمهور اتكلم عنها وحللها كتير على سوشيال ميديا، مشهد عياط "داليا" وعجزها قدام ولادها، خد نصيب الأسد من التعليقات، وهاجر حكلتلنا عن المشهد ده وقالت:

"أنا عارفة الست قليلة الحيلة دي، وعارفة الإحساس ده عندي فين في جسمي وقلبي، الست اللي فاقدة كل حاجة شوفتها، واعرف نماذج زيها، لما صورنا المشهد هاني خليفة قالي أنا هقول أكشن لكن انتِ متأديش مالكيش دعوة بالأكشن بتاعتي، انتِ اللي لما تكوني جاهزة ابدئي".

هاجر كمان قالتلنا أنها كنت قلقانة جداً من شكلها في مشهد العياط، خصوصاً إن الدموع نزلت على الميك أب وعملت خطوط واضحة على وشها، فمسحتها كلها بالمنديل وقررت تكمل تصوير من غيره عشان ماتفقدش إحساسها. وقتها افتكرت نصيحة أستاذ أحمد كمال زمان ليها، إنه مش مهم شكلنا قدام الكاميرا، المهم نكون مصدقين وحاسين بالشخصية، لأن الجمهور هيصدقنا لما نكون صادقين في أدائنا.

ورغم كده، هاجر ماكنتش متوقعة رد الفعل والإشادة الكبيرة من الجمهور، فمن التعليقات اللي مش بتنساها:

"مودي شاهين كلمني قال لي "ده مش عياطك، أنا عارف عياطك، ده عياط الكاركتر"، وكمان أستاذ هاني لما وصفني قدام الناس "إني موهوبة ومخلصة"، وأستاذة منى زكي بعتت لي فويس نوت قالت لي إنها مبسوطة بيّا وفرحانة إن الناس شايفة شطارتي اللي هي شافتها بنفسها، ومريم الخشت بعتت لي تشجعني، لكن أكتر حاجة لمستني تعليقات الناس اللي بتقول لي"انتِ شبهنا، انتِ حقيقية قوي"، وده خلاني أحس بمسؤولية كبيرة جداً."

"يا ساتر يارب على دي حما"

وطبعًا كان لازم نتكلم عن ثنائية "داليا" و"فاتن"، فعرفنا من هاجر شكل كواليس التصوير مع ميمي جمال، واللي قالتلنا عليها:

"ميمي جمال وقت التصوير بتديني الأداء والمشاعر والطاقة بتاعة "فاتن"، وأول لما يخلص المشهد، بتاخد تنهيدة كده وتقول "يا ساتر يارب على دي حما، دي صعبة"، لكن هي جوة اللوكيشن بقى لطيفة وبتهزر والناس كلها بتحبها."

أما بقى الكلام عن منى زكي فمكنش بيخلص، وهاجر حكتلنا إن منى زكي احتوتها من أول يوم تصوير، وإن علاقتهم ماوقفتش عند حدود الزمالة وبس، فكانت دايمًا تهزر معاها وتطمن عليها، وحتى في وسط التصوير كانت تنصحها تستغل أي فرصة وتقعد ترتاح، عشان التعب هيأثر على تركيزها.

وفي النهاية، لما سألنا هاجر لو عندها نصيحة ممكن توجهها لـ "داليا"، قالت إن الحياة مابتقفش على الجواز، وإن من حقها تشتغل وتاخد قراراتها بنفسها، رغم إعجابها بعزة نفس الشخصية وأصولها في تعاملها مع حماتها. وادينا اهو كلنا مستنين السبت الجاي 7 نوفمبر، عشان تتعرض آخر حلقتين من "طالع نازل"، ونشوف "داليا" هتعمل ايه؟