الأغنية أحلى من الفيلم.. ٩ أغاني نجحت أكتر من أفلامها
تفتكر إحساس المخرج إيه لو عمل فيلم ومانجحش؟ أو حتى ممكن يكون نجح، بس الأغنية بتاعته نجحت أكتر منه بكتير؟
الحقيقة إحنا كمان منعرفش إحساس المخرج، بس بما إنك أكيد جه في بالك كذا فيلم دلوقتي واكتشفت إنك فعلًا مش فاكر منهم غير الأغنية، فتعالى نفتكر سوا أغاني نجحت أكتر من أفلامها، أو بمعنى تاني أغاني اتسمعت أكتر ما الفيلم اتشاف.
1- أغنية مسطول- فيلم العيال هربت:
من أشهر الأغاني اللي غناها حمادة هلال، من كلمات هادي أبو اليزيد، اللي بالمناسبة هادي قال إنها كانت مكتوبة لفيلم عوكل، بس دي قصة تانية نحكيها بعدين.
المهم إن الأغنية عملت جدل كبير لما كانت بتتغنى في الأفراح على سبيل الهزار -مشيها هزار-، وده بسبب كلماتها اللي بتوصف أهل العروسة بعيلة واطية ونصابة، لغاية لما حمادة هلال غير كلماتها وبقت بتتغني في الأفراح ويتقال دي عيلة مليانة طيابة.
الأغنية اتقدمت لأول مرة في فيلم العيال هربت، إنتاج سنة 2006، من بطولة حمادة هلال، وماجد الكدواني، وصلاح عبدالله، ومحمد نجاتي، وبشرى، وشريف رمزي، وميرنا المهندس.
والفيلم بيحكي عن مجموعة من الأصحاب بيشتغلوا في إحياء الأفراح عن طريق الزفة بالموتوسيكلات، وبيشتركوا كلهم في حلم واحد وهو السفر برة مصر، لكن بتحصل مجموعة من الأحداث اللي بتصعب عليهم عملية السفر.
2- أغنية أجدع صحاب- فيلم أعز صحاب:
الراعي الرسمي للصحاب وأعياد الميلاد خصوصًا في فقرة الصحاب في الأفراح والليالي الملاح عمومًا.
الأغنية أول ما ظهرت انتشرت بشكل كبير جدًا، لدرجة إنها كانت بتتغنى في إذاعة المدرسة قبل تحية العلم.
أجدع صحاب غنتها سوما، وهي كلمات أيمن بهجت قمر، وألحان محمد يحيى، واتعرضت لأول مرة في فيلم أعز صحاب، إنتاج سنة 2009.
الفيلم بطولة أحمد فلوكس، وأحمد السعدني، وسوما، ومروة عبد المنعم، ولانا سعيد، ومعتز التوني، وبيحكي عن مجموعة من الصحاب بيتقابلوا لأول مرة بعد 10 سنين، في خطوبة واحدة صاحبتهم، وبتحصل بينهم شوية مشاكل، وهنا بيكون السؤال يا ترى صحوبيتهم الكبيرة هتقدر تعدي المشاكل دي ولا لأ؟
3- أغنية كل واحد- فيلم كلاشنكوف:
الأغنية كانت تقديمه مثالية للمغني اللبناني آدم، من كلمات : أيمن بهجت قمر، وألحان : وليد سعد، واتعرضت في فيلم "كلاشنكوف"، إنتاج سنة 2008. الفيلم بطولة محمد رجب، وغادة عادل، وصلاح عبدالله، واللي بيتكلم عن قاتل مأجور اسمه خالد، عاش سنين برة مصر، وكان بيشتغل مع "طه" اللي أمره بتنفيذ عمليات قتل كتيره، ولكن كل ده بيتغير لما "طه" بيطلب من "خالد" إنه يقتل المذيعة "هند الراوي"، وهنا كل حاجة بتختلف. يمكن الفيلم مش من أنجح أعمال محمد رجب ولكن الأغنية وإيفيهات كتير عاشت ولسة بنستخدمها في كلامنا، زي: إيفيهات كتير عاشت زي "طه أبو دقة مايتقالوش لأ"، وكمان "ده أنت ابني يا ابني". وبالمناسبة دي ماكنش التعاون الأخير بين آدم وأيمن بهجت قمر، لأنهم بعدها قدموا مجموعة من التترات، زي تتر مسلسل العار "قولوا للي أكل الحرام"، وتتر مسلسل الكابوس "حب يأذي"، وغيرهم. 4- أغنية عم يا صياد- فيلم يجعله عامر: غالبًا المخرج والمنتج والجمهور مايعرفوش إن في فيلم اسمه يجعله عامر، بس الأكيد إن "عم يا صياد" من أنجح الأغاني الشعبي آخر 10 سنين، واللي غناها محمود الليثي، وكلمات مرسي جميل، وألحان محمد الموجي. "يجعله عامر" بطولة أحمد رزق وبوسي، وبيحكي عن "عامر" راجل معقد نفسيًا، وبيطلق مراته مرات، فهل هيعرف يكمل حياته ويعدي المشاكل؟
5- أغنية سيبها بظروفها- فيلم الاكاديمية:
"سيبها بظروفها" من الأغاني اللي لعلعت في الألفينات، وبجد ماحدش عارف هو أحزان الإنسان كترت عشان يلاقي سبب يسمع عشانه الأغنية، ولا هي الأحزان كانت كتير والواحد معمي.
المهم إن الأغنية غناها بطل الفيلم نادر حمدي، كلمات محمد سرحان وإيهاب عبد الواحد.
الأغنية اتعرضت في فيلم "الأكاديمية" بطولة علا غانم، ومحمود قابيل، وريهام عبد الغفور، وميرنا المهندس، وغدوارد، ونادر حمدي، وأحمد الشامي، وياسر فرج، والفيلم بيحكي عن الحياة الجامعية والتجارب اللي بيمر فيها الشباب، عموما لو هتسألني ممكن تتعلم إيه من الفيلم ده، فنادر حمدي أكدلنا إن الزعل تحت الدش، مختلف خالص عن الزعل سادة.
6- أغنية قلب واحد- فيلم غرفة 707:
الأغنية لمدحت صالح. اتعملت لفيلم "غرفة 707"، بطولة مجدي كامل، ورولا سعد، وراندا البحيري، وياسر فرج، وسامي العدل، والفيلم ببساطة هو روميو وجوليت المصري لأنه بيحكي عن حب الأستاذ الجامعي أحمد لتلميذته في كلية الطب سارة، واللي عيلتهم هما الاتنين بتقف في وش الحب ده، ياترى بقى الحب هينتصر ولا لأ، أظن لو قريت عنوان الليست دي هتقدر تتوقع الإجابة الصح.
7- أغنية كلامي انتهي- فيلم محترم إلا ربع:
تتخيل أحمد سعد بكل البهجة والفرفشة اللي بيقدمها الفترة دي لما يقرر يعمل أغنية كئيبة هيكون شكلها عامل إزاي؟
ده بالظبط اللي حصل في أغنية "كلامي انتهى" غناء أحمد سعد وكلمات ملاك عادل وألحان محمد عبد المنعم، واللي من ساعة ما طلعت ساعتها لحد النهارده كسرت الدنيا وبقت الراعي الرسمي لتقطيع الشرايين مناصفة مع أغاني تامر عاشور طبعًا.
الأغنية اتعملت لفيلم "محترم إلا ربع" بطولة محمد رجب، ولاميتا فرنجية، وأحمد زاهر، ومادلين طبر، وليلى أحمد زاهر، وإدوارد، وهو بيحكي باختصار عن رسام الكاريكاتير "هشام" اللي بيشتغل في جريدة وبيحاول يستخدم رسوماته في مواجهة الفساد، ولكن صاحب الجريدة بيمنعه، فيا ترى الموضوع هيخلص على إيه؟
8- أغنية ماقدرش أقول- فيلم 90 دقيقة:
الأغنية غنتها سوما لفيلم 90 دقيقة، وغالبًا لو دورت وسمعت الأغنية هتسأل أين الكرامة أنا لا أراها؟
"90 دقيقة" بطولة سامو زين، وزينة، وغادة عبد الرازق، وأحمد هارون، وبيحكي عن قصة حب كبيرة بتجمع ما بين "عادل" ونسمة" ولكن عائلة "عادل" بترفض الحب ده وبتحاول تخليه يحب "شيرين" عن طريق إنهم بيخدعوه وبيقولوله إن "نسمة" ماتت، الأهم بقى من الفيلم خلص على إيه وهل الحب انتصر ولا لأ، هو إننا نعرف كرامة "شيرين" راحت فين؟
9- أغنية اه لو لعبت يا زهر- فيلم أوشن ١٤:
أحمد شيبة كسر الدنيا بالأغنية دي، وتقريبًا مفيش فرح أيًا كان مستواه مش بتشتغل فيه "اه لو لعبت يا زهر"، وبالأرقام الأغنية عدت على يوتيوب 500 مليون مشاهدة.
الأغنية اتعملت كدعاية تجارية لفيلم "أوشن 14" غالبًا ده كان النجاح الوحيد اللي حققه الفيلم بعد ما فشل في دور العرض وحتى بعد ما اتعرض على التليفزيون.
بس على العموم الفيلم بطولة عمر مصطفى متولي، وكريم عفيفي، ومحمد أنور، وحمدي المرغني، ومصطفى خاطر، وبيحكي الفيلم عن فرقة حرامية قرروا يسرقوا مجوهرات الفنانة أحلام.
يمكن فعلًا إن الأفلام دي مانجحتش بس الأكيد إنهم سابوا لينا جزء من الذكريات اللطيفة اللي بنضحك لما بنفتكرها، ويمكن بسبب الذكريات دي أصلًا كتبنا الليست دي محدش عارف، المهم إنك تقولنا بقى إيه أغاني تاني بتحب تسمعها وشايف إنها نجحت بعكس الفيلم بتاعها؟
- الموضوع اللي فات أول منصة إلكترونية لتدريب العاملين في مجال السياحة والآثار “EGTAP”
