فيلم "ولا عزاء للسيدات" هيشارك في مهرجان أسوان لأفلام المرأة

إيه اللي هيحصل لو فيه جثة لست واللي حواليها اكتشفوا حاجة بتتعلق بسمعتها أثناء غُسلها؟

ده اللي بيناقشه فيلم "ولا عزاء للسيدات Love Bites" بطولة صدقي صخر، واللي هيشارك في مهرجان أسوان الدولي لأفلام المرأة في الفترة من 2 لـ 7 مايو.

أحداث الفيلم بتدور عن الأخين "زاهر" و"مراد" اللي بيلاقوا نفسهم في ورطة كبيرة وهما بيجهزوا أختهم هيام للغُسل والكفن، بعد ما يلاحظوا آثار عضّات (Love bites) على جسمها، وبيخافوا من الفضيحة. الضغط بيزيد عليهم، وكمان على زوجاتهم، لأن الكل لازم ياخد قرار مصيري ممكن يأثر على سمعة العيلة كلها. وفي نفس الوقت، الناس المُعزّيين بدأوا يتجمعوا، والمُغسلة وصلت، ووقت صلاة الظهر والجنازة بيقرب، بس الدنيا بتتعقد أكتر، وفجأة بيكتشفوا سر كبير بيغير كل حاجة.

فيلم "ولا عزاء للسيدات Love Bites" من بطولة: صدقي صخر، سهيلة الأنور، نادية حسن، محمود يحيى، سارة علاء الدين، روان علاء الدين، ومن تأليف وإخراج محمود زين.

• "اللي شجعني أعمل الفيلم هو موضوعه الجريء وتناوله للقضية من منظور مختلف، ومشاركته في مهرجان لأفلام المرأة هو شهادة على دعمه لقضية المرأة وقوة تأثيره وقيمته الفنية العالية".

صدقي صخر - ممثل



"فكرة الموت دايمًا بتشغلني، وخصوصًا فكرة إن يموت الإنسان واللي حواليه يكتشفوا حاجة تخلي الميت عُرضة لإطلاق الأحكام، بعد ما أصبح جثة هامدة لا حول لها ولا قوة. من هنا كانت البداية وتطورت الفكرة لحد ما أثارت سؤال: "إيه اللي هيحصل لو كانت الجثة لامرأة في مجتمع بيسيطر عليه الذكور؟".
محمود زين - مخرج فيلم "ولا عزاء للسيدات Love Bites"