أنيماتيكس.. فعاليات بتحكي حكاية أول رسمة اتحركت ولسه ماوقفتش

رسومات كبرت، وأصوات دخلت بيتنا، وشخصيات بقت جزء أساسي من ذكرياتنا. والسنة دي، "أنيماتيكس" بيرجع يحكي الحكاية من أول وجديد، وبيحتفل بـ 90 سنة أنيميشن مصري.

"أنيماتكس".. أكبر من حكاية كرتون:

في قلب وسط البلد وتحديدًا في الجامعة الأمريكية بالتحرير، ومن 11 لـ 15 فبراير. فعاليات أنيماتيكس في دورتها السادسة اتقدم ليها أكتر من 2000 فيلم، من 111 دولة مختلفة، عشان يشاركوا في المسابقة العربية والدولية، في أكبر فعالية سنوية للرسوم المتحركة في مصر.

أدهم سيد، المتحدث الإعلامي لـ أنيماتكس، بيقولنا إن من أول دورة وفعاليات أنيماتيكس وورش العمل هدفها كان أكبر من مجرد تعليم مهارات، وده لأنها بتخلق مساحة للتبادل والخبرة، وبتخلي المشاركين يحسوا إنهم جزء من مجتمع الرسوم المتحركة العالمي، وبالتبعية ده بيطور الأنيميشن المصري.

ليه تروح "أنيماتكس"؟

فعاليات أنيماتكس السنة دي مختلفة جدًا، ومناسبة لكل الجمهور باختلاف خبراتهم، وأذواقهم، وأعمارهم. وده عشان يمثل كل فئات الجمهور، من الطلاب للفنانين والمحترفين، وكل واحد يلاقي حاجة تقربه من الرسوم المتحركة.

فلو أنت جاي تدور على النوستالجيا، والأفلام اللي شكلت ذكرياتنا، ففي أنيماتيكس هيتعرض فيلم "حكاية لعبة" بمناسبة مرور 30 سنة على دبلجته بالمصري، وفيلم "حياة الإمبراطور الجديدة" احتفالًا بمرور 25 سنة على دبلجته.

ولو بتحب تكتشف الأفلام، وتشوف العالم من حوالينا بيقول إيه، فهيتعرض الدورة دي فيلم “بلال” واحد من أوائل الأفلام العربية الطويلة اللي اتعملت، وفيلم "Little Amelie" الحائز على جايزة الجمهور لأفضل فيلم طويل في مهرجان أنيسي 2025 ومترشح لجائزة أحسن فيلم رسوم متحركة في الجولدن جلوب وجوايز آني.

كمان هيتعرض فيلم “Into the Wonderwoods” المترشَّح لجايزة أفضل فيلم طويل في مهرجان أنيسي 2024، والفيلم الألماني "مغامرات الأمير أحمد" أقدم فيلم رسوم متحركة طويل بيتم 100 سنة من ساعة ما اتعمل، وهيتعرض فيلم "Sultana's Dream" الحاصل على 12 جائزة واترشح لـ16 جائزة تانية، من بينهم جائزة أفضل فيلم طويل في مهرجان أنيمافست زغرب 2024، وفيلم "Tales from The Magic Garden” الحائز على جائزتين كأفضل فيلم و سيناريو في مهرجان السينما السلوفينية ومرشح لجائزة أفضل فيلم رسوم متحركة أوروبي طويل في مهرجان الفيلم الأوروبي 2026، وأفلام تانية كتير هتلاقيها في جدول الفعاليات.

وغير الأفلام، فهيكون في ندوات ومناقشات مع كبار صناع أفلام الرسوم المتحركة في العالم، زي: 

لورا توفاريدس مخرجة وكاتبة ورسّامة تحريك ستوب موشن، وأيمن جمال اللي اتصنّف من مجلة Variety ضمن أفضل 10 مخرجين في العالم العربي، وبحسب مجلة Arabian Business، كواحد من أكتر الشخصيات تأثيرًا على مستوى العالم.

وكمان المصري مينا إبراهيم، مشرف ومخرج أنيميشن اشتغل على أفلام زي Spider-Man: No Way، وصانعة الرسوم المتحركة المصرية سارة متى، ومايك هولينجسورث أول أنيميتور تعيّنه نتفليكس، وغيرهم من ضيوف تانية كتير.

وحتى الأطفال معمول حسابهم، "أنيماتكس" عامل برنامج مخصوص للأطفال اللي بتحب الرسوم المتحركة، فيه هيتعلموا أشكال الشخصيات والمجسمات مع ضحى هاني، وهيشوفوا أفلام زي "ماروكو الصغيرة: وعد الأصدقاء"، وأفلام تانية كتير.

"أنيماتكس".. 90 سنة رسوم متحركة مصرية:

لما سألنا أدهم عن تاريخ مصر في الأنيميشن، قالنا إن عدد كبير من الرسوم المتحركة اللي بتتعمل برة بتكون بأيد مصرية، فـ مصر هي الرائدة في الانيميشن في الوطن العربي، عشان كده أنت في أنيماتكس هتشوف كل حاجة تخص عالم الرسوم المتحركة، من أفلام قصيرة لأفلام طويلة، ومن أفلام طلبة لأفلام عالمية، وده بجانب الورش والندوات، والفعاليات، اللي كلها بترجع تفكرنا بحاجة مهمة وهي إن على قد ما عالم الأنيميشن كبير، فهو بدأ هنا في مصر من 90 سنة.

من 2020، وأنيماتكس عنده دور واحد، ورسالة عايز يقدمها، وهي أنه يعرف كل الجمهور يعني إيه رسوم متحركة مصرية، فمش بس المهتمين بالمجال هما اللي المفروض يحضروا أنيماتكس، لكن كمان الطلبة والجمهور اللي مايعرفش حاجة عن مجال الأنيميشن، عنده فرصة يحضر ويشوف بنفسه في الفعاليات يعني إيه رسوم متحركة؟

"إحنا كل سنة بنكبر، بس دايمًا حريصين إن تذكرة أنيماتكس يفضل سعرها مناسب للطلبة، لأن الطلاب من حقهم يشاركوا ويعرفوا أكتر وأكتر عن مجال بيحبوه."

أدهم سيد، المتحدث الإعلامي لأنيماتكس

كده أنت عرفت يعني إيه أنيماتكس، بس لسه ماعرفتش يعني إيه 90 سنة رسوم متحركة مصرية، فسواء كنت فنان أو مهتم، أو حتى جاي تستكشف الموضوع لأول مرة، فدي فرصتك تدخل عالم جديد، مليان حركة وألوان والأهم حواديت، كل اللي عليك إنك تحجز تذكرتك دلوقتي من على TicketsMarche. وتتابع صفحة animatix عشان تتابع جدول الفعاليات.